Difi Grunngjeving for Klarspråksprisen 2009

Kandidatane arbeider innanfor svært ulike område og har ulike utfordringar og målgrupper. Materialet dei har sendt inn,  viser at det ikkje berre finst éin måte å arbeide med klarspråk på, men mange ulike. Fleire av kandidatane har jobba lenge og systematisk med klarspråk, medan andre er i startfasen og har presentert gode, planlagde framtidsprosjekt. Juryen hadde lange og intensive diskusjonar før han til slutt klarte å semjast om ein prisvinnar.  

Juryen håpar at denne prisen kan inspirere og stimulere fleire statsorgan til å satse på klarspråksarbeid og vere med å tevle om prisen til neste år.  

Så til vinnaren:  

Prisen går til eit statsorgan som arbeider innanfor eit felt med mykje vanskeleg juridisk og økonomisk terminologi. Det møter store utfordringar i å gjere tunge formuleringar om til godt og klart språk og i å synleggjere kva rettar og plikter brukarane har. Statsorganet har heilt sidan år 2000 arbeidd breitt og systematisk med å betre språket i alt frå brev, brosjyrar og skjema til nettkommunikasjon - på både bokmål og nynorsk.  

Vinnaren har gjort ein ekstraordinær innsats og lagt ned eit omfattande arbeid i brukarundersøkingar. Juryen er spesielt imponert over måten dei har involvert ulike brukargrupper i klarspråksarbeidet på. Takka vere dette arbeidet kan statsorganet dokumentere konkrete resultat og betre forståing i brukargruppa.  

Juryen meiner det er eit ekstra pluss med det såkalla «moderniseringsprosjektet» i statsorganet der det har innarbeidd klarspråksperspektivet også i nettenestene.  

Prisvinnaren er eit statsorgan svært mange nordmenn har eit forhold til. Vinnaren har over 800 000 brukarar i alle aldersgrupper. Statsorganet arbeider med noko vi alle er avhengige av, nemleg å skaffe pengar til mat på bordet, tak over hovudet, men framfor alt å skaffe oss ei skikkeleg utdanning.  

Klarspråksprisen for 2009 går til Lånekassen!

Heidi Grande Røys med vinner av Klarspråksprisen 2009